For di 1986 diferente fundacion y organisacion, e.o. Osticeba, CEDE Aruba, ATHA, YMCA, diferente centro di cuido di mucha, AHATA, Departamento di Asuntonan Social y personanan individual a traha riba varios aspecto di cuido y guia di mucha na Aruba a base di diferente necesidad cu nan a señala.
Na 1990 a lanta un plataforma consistiendo di diferente gremio den comunidad. E plataforma a cuminsa cu combersacionnan pa bin cu un solucion pa e difernte problemanan cu a surgi rond di e cuido y guia di mucha na Aruba. Tabata bisto cu ta necesario pa lanta un instancia den forma di un fundacion, cu lo mester bai dirigi su mes principalmente riba e trabou di cuido y guia di mucha.
Dia 12 di juni 1991 nos fundacion a bira un hecho y a lanta cu e meta pa sostene, guia y optimalisa centronan di cuido y guia di muchanan di 0 pa 14 aña. Tambe pa duna informacion na publico en general y en particular na mayornan tocante preguntanan di educacion di muchanan. Punto di salida pa nos fundacion ta e Declaracion Universal di Derechonan di Mucha, proclama pa Nacionnan Uni y e Convencion riba Derecho di Mucha.
Na aña 1992 cu principalmente yudansa financiero di Bernard van Leer Foundation di Hulanda, nos por a cuminsa cu nos actividadnan. E yudansa aki a sigi pa tres aña y mei y e tabata cubri salario di un trahador pedagogico, e gastonan di explotacion di e oficina y gastonan relaciona cu e plan di actividad di FPNM. Gobierno di Aruba desde comienso a pone un trahador pedagogico disponibel pa FPNM y desde 1993 a cubri salario di un trahador administrativo part time. CEDE Aruba a subsidia e inversionan pa set-up e oficina.
30 di november 1992 a tene e apertura oficial di oficina di FPNM na Mandolinstraat 6. Nos tabata ubica akinan te cu cuminsamento di mei 2004 ora cu nos a muda pa Cumana 2.
Desde 1996 gobierno di Aruba ta cubriendo gastonan di salario di un trahador pedagogico y e gastonan di explotacion di e oficina, ambos cu tabata cubri inicualmente dor di Bernard van Leer Foundation.
Na aña 1999 saliendo for di e experiencia den practica y pa por tin mihor coneccion cu etapanan di bida di mucha a baha e edad di 14 pa 12 aña.
Dia 12 di Juni 2001 nos a celebra nos di dos lustro. Durante e celebracion tabata tin diferente orador e.o. Minister di Asuntonan Social, lider di centro di mucha, un mayor y un docente.
Na juni 2003 e team di trahador pedagogico a amplia cu un di tercer trahador, despues cu gobierno a bai di acuerdo na december 2002 pa subsidia salario di un trahador mas. Na 2003 tambe a cuminsa cu e proceso pa defini e vision y mision di FPNM.
Na mei 2004 nos oficina ta muda pa Cumana 2. E necesidad a sali for di e hecho cu e oficina na Mandolinstraat a bira demasiado chikito pa por acomoda publico y trahadornan debidamente. Al momento tin espacio adecua pa ricibi publico den nos centro di documentacion unda por scohe di varios buki y material audiovisual, cada trahador tin nan oficina y tin espacio pa por tene difrente tipo di reunion.