FPNM ta un proveedor di servicio di prome liña cu ta dirigi primeramente riba prevencion cu 35 ana di experiencia. Nos metodo di trabou ta generalisa y dirigi riba guia cu un duracion cortico, acceso facil y integral. Tayernan pa mayornan generalmente ta gratis y cursonan pa centronan di cuido di mucha ta accesibel na un costo minimo. Punto di salida di tur trabou cu FPNM ta eherce ta bin di e Tratado Internacional di Derechonan di Mucha. Nos grupo meta primordial ta, mayornan cu yiu entre 0-12 ana y centronan di cuido y guia di mucha. Aserca di e grupo aki nos ta ofrece nos servicio na otro adultonan cu directamente of indirectamente ta cuida of traha cu mucha.
Nos Historia
FPNM a lanta dia 12 di juni 1991.
Varios instacia y persona tabata envolvi cu educacion di cuido y guia di mucha. Nan a mira e necesidad pa lanta un organisacion pa sostene hendenan cu ta traha cu mucha den Centro di Cuido y Guia di Mucha (CdCdM).
Algun di e instancianan aki tabata Cede Aruba, Osticeba, Departamento di Enseñansa, Stichting Wit Gele Kruis, varios CdCdM di centronan di bario, y Departamento pa Asunto Social.
Bernard van Leer Foundation tambe tabata tin un rol importante den lantamento di FPNM. BvL Foundation, Cede Aruba y Gobierno di Aruba tabata e motor financiero den e prome 3½ aña di FPNM.